Dost aur Ahbab ka kirdar Aulad ki Tarbiyat me.

Aulaad ki Tarbiyat – Part 10

L). Tarbiyat ka 12th marhala

Dost aur Ahbab ka kirdar Aulad ki Tarbiyat me.

Aulaad ki Tarbiyat me dost aur ahbab ka bhi aham role hai warna acche acche bacche bigad jate hain. Yaha walid ka ye kaam hai ki Humare bacche aur bachiyan kaha jate hain aur kaun kaun unka dost hai, unke Akhlaq kya hai unke muamlat kya hai wo kiske bacche hain unki kamayi kaisi hai ispar pura nazar rakhe aur dhyan dene ki zarurat hai.

Aaj kal dekha jata hai ke, baaz martaba baccho ko Maa Baap toka karte hain ke wo falah bache ke sath raho wo bohot Ameer hai. Subhan’Allah! aap Ameeri ko tarjeeh de rahe hai? jabki aap ko ye kehna chahiye ke beta Deendaro ke sath raho wo deendar hai us’se dosti karo aur bure baccho se door raho jo gandi gandi batein karte hain.

Aaj kal dekha jata hai ke, baaz martaba baccho ko Maa Baap toka karte hain ke wo falah bache ke sath raho wo bohot Ameer hai. Subhan’Allah! aap Ameeri ko tarjeeh de rahe hai? jabki aap ko ye kehna chahiye ke beta Deendaro ke sath raho wo deendar hai us’se dosti karo aur bure baccho se door raho jo gandi gandi batein karte hain.

✦ Acche dosto ka intehkhab kare

Aajkal Hum dekhte hai maaldar koun hai taaki humara baccha high society me uthey aur baithe ye sab falthu batein hain yaad rakhiye , jabki deendar baccho me rakhiye! Unke Akhlaq dekhiye kaise hain jin baccho me humara baccha aur bacchi reh rahi hain, unpar nazar rakhiye ke aise bacho me rahe jo ba-akhlaq ho ba-adab ho baqeerdar ho aur Achche khandano se taluk rakhte ho yaani nek aur deendar khandan. Warna Shaitaan Bacho ko bahut asani se uchak leta hai is muqam par.

Allah ke Rasool (Sallallahu Alaihi Wasallam) farmate hai ek hadees ke andar ke “Aadmi apne doston ke deen par hota hai.” Matlab aadmi wo kaam karta hai Jo uske dost aur saheliyan karti hain tou aadmi apne doston ke deen par hota hai, lehaza tum me se har fard ko ye khayal karna chahiye ke woh kis se dosti kar raha hai.

Agar mai bada ho chuka tou mai tou samaj sakta hun ke mai fikr karu lekin jab bacche chote hain tou ye cheez samajte nahi hai , lihaja waledain fikr kare ke unki Aulad ka jo dost hai accha rahe aur apne aulad ki acche doston se dosti karwaiye.

Ek arbi shayar hai unhone ek sher likha aur kaha ke “Aadmi ke akhlaq ke bare me janna hai tou usse mat pucho balke ye dekho uske dosto ka Akhlaq kya hai jaise dosto ka Akhlaq hai wasse uske honge .

English me bhi ek misal hai “Birds of Same Feather Fly Together.” Ek jaise qism ke pareende ek sath hi urte hai.

Gande log ek sath rehte hai acche log bhi ek sath rahte hai, chor uchakke ek sath rahte hai har qism ka ek tabqa hota hai wo ek sath rehna pasand karta hai , tou doston se humari aur aapki shanaqt hai, lihaja achche logo se dosti karwayiye apne baccho ki.

to be continued.

Aulaad ke bich Adal (Insaf) karey

G). Tarbiyat ka 7th marhala:

Aulaad ke bich Adal (Insaf) karey:

Aaj aksar dekha jata hai ke Aulaad me Nainsafi bohot aam hai , Baap ek Bacche ko humesha Godd leta hai, koi puche ke isko kyu lete ho tou kehta hai: “Ye Baccha bohot Gora hai mujhe Pasand hai, baaki wale thodey rang me kum hai” Subhan’Allah! kya Ajib baat hai, Aap sirf Rangat ki buniyad par Baccho me Nainsafi karte ho.

“Mujhe Pehle Ladkiya hui 2-3 isiliye mujhe inse Mohabbat nahi jitni is ladke se Mohabbat hai” Subhan’Allah ! aap is tarha se Nainsafi karte ho Baccho me.

Tou is tarha se agar nainsafi karoge, yaai Adal nahi karoge tou wo bhi badey hokar Nainsafi karne lag jayenge, aur Aaj nainsafi ka kya muamla hai beharhaal bataney ki jarurat nahi , Maalo-Doulat ki taqseem me Adal (insaf) nahi karte aajkal hum, Aulaad se Mohabbat me adal nahi karte.

Jab ki “Humara Deen tou hume har haal me Adal yaani Insaf karne ka hukm deta hai.” 

Allah ke Rasool (Sallllahu Alaihay Wasallam) ke zamane me Noman bin Basheer(R.A.) farmatey hai ke “Mere walid ne ye irada kiya mujhe kuch tohfey me dey , tou meri Walida ne kaha ke jabtak tum Rasool’Allah ﷺ ko is muamle par Gawah na banao, mai is cheez ko Qabool nahi karungi.”

Dono Rasool’Allah (Sallllahu Alaihay Wasallam) ke paas gaye aur uss khatoon ne kaha ke: “ya Rasool’Allah ﷺ! Basheer apne Bete Noman ko kuch dena chahtey hai Aap is par gawah ho jaiye.”

Aap (ﷺ) ne pucha: “Basheer! kitne Bacche hai tumhare, sirf Noman hi hai ya aur bhi hai ?”

kaha ke: “aur bhi hai.” ,… pucha gaya ke : “kya Sabko dey rahe ho?”

kaha ke “Nahi! sirf Noman ko de raha hu.”

Tou Aap (Sallllahu Alaihay Wasallam) ne farmaya ke: “Mai Zulm ke muamle me Gawah nahi ban sakta”

Lihaja “Aulaad me nainsafi karna Zulm hai.” is se Ahtiyat karey warna badey hokar unka baagi ban jana lazmi hai.

H). Tarbiyat ka 8th marhala:

Aqeeda aur Acche Akhlaaq sikhaye

Aulaad ki tarbiyat me sabse aham marhala ye hai ke unhe Aqeeda aur Akhlaaq sikhaye. khud Rasool’Allah (Sallllahu Alaihay Wasallam) ka ye mamool tha ke Aap ﷺ Baccho ko Aqeeda sikhatey they.

Ek Riwayat me aata hai ke: Abdullah ibn Abbas (R.A.) farmatey hai ke (Mere Bachpan me) mai ek martaba Aap (Sallllahu Alaihay Wasallam) ke sath unth ke pichey baitha tha, tab Rasool’Allah (Sallllahu Alaihay Wasallam) ne mujhe kuch Taqeede ki aur farmaya :

“Aye Abdullah! tum Allah ke Ahqaam ki hifazat karna, wo tumhari hifazat karega , Tum Allah ke Ahqaam ki hifazat karo tou tum usey apne samne paoge, jab tum koi sawal karna(mangna) tou sirf Allah se karna, hatta ke ek riwayat me Aap ﷺ ne farmaya: ke tumhe Namaq bhi chahiye Abdullah tou Allah se mangna aur jutey Ka tasma (shoe laces) bhi chahiye tou Allah se hi talab karna , jab tumhe Madad talab karna hai tou sirf Allah hi se karna.

Fir Aagey Aap (Sallllahu Alaihay Wasallam) farmatey hai

" Yaad Rakh! agar puri Duniya bhi tumhare haq me Aajaye aur chahe ke tumhe koi fayda dey tou wo fayda nahi pohcha sakti siway wo jo Allah ne likh rakha hai aur agar puri dunia bhi tumhare khilaf khadey ho jaye aur chahe ke tumhe nuqsaan pohchaye tou wo nuqsaan nahi pohcha sakti siway Allah ne jo likh diya hai ,.. isiliye ke Qalam rakha ja chukha hai aur syahi sukh chuki hai".

- (Mafhoom-e-Hadees; Tirmizi Sharif)

Aagey Aap (Sallllahu Alaihay Wasallam) farmatey hai:

" Khush hali me Allah ki taraf ruju karo tou pareshan haal me wo tumhe faramosh nahi karega , yaad rakho! jo cheez tumhe nahi mili wo tumhe kabhi nahi milni thi , aur jo cheez tumhe mili wo tumse nahi cheen sakti , yaad rahe ke Allah ki madad Sabr se wabasta hai, koshish takleef ke sath hai aur aasani tangi ke sath".

- (Mafhoom-e-Hadees: Ahmed)

♥ SubhanAllah! Tou dekhiye Adullah ibn Masood (R.A) ko Allah ke Rasool (Sallllahu Alaihay Wasallam) ne kya pyari nasihate ki , lihaja hume bhi chahiye ke hum bhi apne Baccho ko Aqeeda Sikhaye.

Aayiye ek aur Akhlaq ke wakiye par gour karte hai.

Aap (ﷺ) ek martba apne Ghulaam Zaid bin Haris (R.A.) ko lekar Ek Dawat me jatey hai , Zaid bacche they isiliye wo Adab-e-Dawat se anjaan they, ek thali me khana surf kiya tha ke Zaid apne ultey hath se aur dusri taraf ke hisse ki janib badhkar khane lagey. Tou Aap (ﷺ) ne ye majra dekha aur Apne Ghulaam Zaid bin Haris ke Akhlaq ki islah dekhiye kitne Pyare Andaz se karte hai.

Aap (ﷺ) ne kaha Aye mere pyare bete! jab khana Shuru karo tou Allah ka naam lo (yaani Bismillah kaho) , Sidhey hath se khao, aur jo samne ho pehle wo khao.”

Zaid bin haris(R.A.) kehtey hai ke – “Rasool’Allah ﷺ ne jis andaz se meri Islah aur tarbiyat ki ke tamam Zindagi mera yahi usool raha aur mai khane se pehle Bismillah kehta , sidhey hath se khata aur samne wali janib se shuru karta..” (Subhan’Allah)

Tou ye nasihat hai jo hume karna hai Apne Baccho ko , kyunki Bacche tou masoom hotey hai , wo anjan hotey hai aise taur tareeko se, lihaja unke kafeel hone ke naatey hume unki islah karni hai Sunnat-e-Rasool ke mutabik aur agar baccha baar-baar samjhaane ke bawajud bhi aisi galatiya dohrata hai tou thodasa Zarb laga saktey hai taaki Aayinda wo us se Sabaq hasil karey.

♥ In sha Allah ul Azeez! Allah hume Sunnat-e-Rasool ke mutaik tarbiyat ki taufik dey.

To Be Continue …

Khel kood ka nazm aulad ki tarbiyat me

M).Tarbiyat ka 13th marhala

Khel kood ka nazm aulad ki tarbiyat me

Khel kood ka nazm bahut aham cheez hai yaad rakhiye, lekin aaj mukkamal is shobe ko humne khatm kar diya hai aur Khel khud ka koyi nazm hi baki nahi raha, jabki waledain unko khud aise khel khelwayen jisse unke sehat aur nashonuma hoti rahe, aur har waqt me har marhale me alag alag cheez unko khel waiyye jaise Swimming aap karwa sakte hai chote baccho ko, Cycling aap karwa sakte hai, isi tarah aise games jinse unke andar sehat barhti ho jaise aap unhki Doud (race) lagwaye, competitions karwaiye, ye bahut aham cheez hain yaad rakhiye isko mat bhulaye.

✦ Baccho ko Khel kood ki Ahmiyat :

Jab waledain baccho ke Khul kood par tawajjo nahi dete to wo mukammil khel khud me dub jata hai. jabki Waledain ko chahiye ke wo khud ko kahe chalo ab khelne ka waqt hai bete tumhara. Hum khelenge aur nahi hai tou aap dosto ko bulao hum khel karenge aapke sath ye hona chahiye. Yaad rakhiye ye nahi hoga tou bache bolenge are waledain ko kya samajh me aata hai.

Bacho me yaad rakhye extra energy hoti hai uska istemal karwana chahiye, aap nahi khelne denge tou wo kahi bhi jaker kuch bhi karke usko istemal karlenge. lihaja Usko khelne ke liye ek nazm banaiye, achcha sa aur yaad rakhiye muslim ki ek riwayat hai Aap (Salallahu Alaihi Wasallam) farmate hai “Taqatwar momin Allah ke yaha kamzor momin se zyada behtar hai.”

jabki khair tou sabme hai har momin khair hai.”lekin wo momin jo jismani aitebar se takatwar hai Allah ke nazdeek mahbub hai isliye kyun ki ibadaton me riyazaton me aur Allah ke deen ke liye zyada mehnat kar sakta hai banisbat kamzor momin ke, halaki khair tou sab me hai lekin achcha kaun hai mahbub jo zyada taqatwar ho.

tou khel kood ka inke liye nazm kare isi tarah isme competition karwaiye mukabale karwaiye.

✦ Bacchon me Competition karwaye:

Baccho me acchi sehat aur kuwwat ke liye aksar mukable karwaye, misal ke taur par aap 5-6 bhai hai jinke bache hai sabme competition lagwaiyye ke aaj jo falan kaam karega usko ye inam milega aaj jo fala khel khelegha usme jeetega usko ye inam milega, Is tarha ke competition karwaiyye.

Umar bin khattab (RaziAllahu Anhu) bacho me competition rakhwate they taaki jismani aitebar se khub nasho numa paye aur Allah ke deen ke liye jihad ke liye taiyyar ho. tou uske liye competition karte, kushti, tirandazi, tairaki (Swimming) aur ghode ki sawari ( horse riding) ke khel hote they tou ye khel unko khelwaiyye waladain is talluk se koshish kare isi tarah competitive exam me inhe le jaen, exam me inko shamil karwayen jahan tak ho sakey isse unme justaju paida hoti hain.

✦ Nasrani Badshah ke 4 sawal aur Abdullah bin Abbas (R.A.) ke Jawab.

Ek waqiya hai Ameerul Momineen Umar bin Khattab (R.A) ke Zamane me ek Nasrani badshah ne 4 sawal Ameerul Momineen ko likh kar diye aur kaha inke mujhe jawab do agar waqay me tum kitab ke hamil ho tou.

Ameerul momineen ne wo sawalat liye aur kaha Abdullah ibne Abbas (R.A) se kaha ke tum jawab de do.

Abdulla ibne Abbas (R.A) ne liya aur jawab dene lage.

Pehla sawal usne ye kiya tha ke Aisa kaun sa muqam hai duniya me jaha suraj ki roshni sirf ek bar pohchi hai aur ab qayamat tak nhi pahuchene wali ?.

Dusra sawal Kaun se 2 Judwa bhai hai Jo paida tou sath me huye aur mare bhi sath lekin umar me 100 saal ka farq tha dono me ?

Tisra faramaya Aisa kaun sa insan hai jo Qabr me ho lekin zinda ho, uski Qabr bhi Zinda ho usko lekar ghumti ho aur uske baad phir wo Qabr me se nikle aur tab bhi wo Zinda rahe.

Chautha Sawal: Aisa kaun sa jail (qaidkana) hai jaha mujrim ko sans lene ki ijazat nahi ?

ye 4 sawal badshah ne jab diye to fauran Abdulah bin Abbas ne sawal liye aur Badshah ko likh kar jawab de diye.

Abdulla bin Abbas (R.A) ne 1. pehla sawal ka jawab diya “Ye wo bahre ahmar ka hissa hai jaha se Musa (A.S.) bach nikle jo samundar khula roshni gayi ab Qayamat tak roshni nahi ja sakti samundar agaya wapas. Ab qayamat tak wahan roshni nahi jayengi.

2. Dusra sawal ka jawab diya Uzair (A.S) aur unka bhai, 3. tisre sawal ka jawab ye diya Yunus (A.S) hai jo machli ke pait me the jo ke ek qism ki qabar hai aur wo machli unhe lekar samundar me ghumti rahi, baad me lakar kinae par fenk deya .jab ke wo bahar Zinda nikle.

Aur chauta(4) sawal ka jawab diya ke “Wo Maa ki kok aur pet hai jaha bacha zinda tou hota hai magar sans nahi leta .

Jab badshah ko in sawalat ke jawab mile tou dang ho gaya aur kaha lagta hai abhi bhi inme koyi Nabi zinda hai. SubhanAllah!

To be continued …

Baap ki Dua

Aap (ﷺ) Ne Farmaya

Baap Ki Dua

Aulaad K Haq mein Aisi Hai 

Jaise Nabi Ki Dua

Ummat K Liye

Show Affection towards your children

Allah's Messenger (peace be upon him) kissed Al-Hasan ibn `Ali while Al-Aqra` ibn Habis At-Tamimi was sitting with him. Al-Aqra` said, “I have ten children and have never kissed one of them.” The Prophet cast a look at him and said, “Whoever is not merciful to others will not be treated mercifully.” 

(Al-Bukhari)

Be Patient with the Children

When your children flood you with a thousand questions, answer them with patience! Showing mercy towards the kids is one of the simplest Sunnahs we can follow in our lives.

Be Patient with the Children

When your children flood you with a thousand questions, answer them with patience! Showing mercy towards the kids is one of the simplest Sunnahs we can follow in our lives.

School, College aur Darasgah ka kirdar Aulad ki Tarbiyat me

Aulaad ki Tarbiyat – Part 9

K). Tarbiyat ka 11th marhala :

School, College aur Darasgah ka kirdar Aulad ki Tarbiyat me

Aulaad ki tarbiyat me Maa Baap ke baad sabse aham muqam Darasgah(schools & college etc) ka hai, tou ek walidain ke liye zaruri hai ke acche Darasgah, accha School accha College, acche Madarse ka intekhab kare apni Aulad ke liye.

Hum dekhte hai ke aaj Duniya ne ye tarika banaya ke apne mazhab ke tablig ke liye wo school khol rahe hai Isaiyon(Christian) ne, Hinduon ne aur bhi mazhab walo ne apne School khol diye aur unhone in schools ko taleemi darasgah banaya taki wo apne mazhab ki tablig kare.

✦ School ke bare me Musalmano ki kotahi ka Anjam :

Aaj afsos ki baat hai ke Musalmano ne is field me koyi kaam nahi kiya, Madarse tou bahut banaye lekin darasgah ke liye kuch kaam nahi kiya, Illa mashaAllah. fir majburan humare Bacchon ko jana padta hai aise schools me, aisi Darasgaho me jaha usko aadha issai(Christian), aadha Hindu bana diya jata hai unki taleem khatam hone tak.

Jahir si baat hai kab tak ek bacha us School me jakar issaiyat(Christianity) se bachta rahegha jaha roz prayer ho rahi hai Isa Alaihi Salam (jesus christ) ke naam se aur wo khada hai 10 saal se waha ja kar wo kitne din bach payega uss takreero se, un baaton se ?.

Tou Musalmano ne ispar koyi kaam nahi kiya jab ke aaj Duniya ne apne deen ke tableeg ka markaz bana diya School ko humne is muamle me koyi mehnat nahi ki aur agar ki bhi tou deen se alag karke kiya. aur aise school khole jaha Islam ki kuch batein nahi batayi jati hai.

Gair Musalmano ne Taleem aur mazhab ko sath kar diya aur Musalmano ne alag kar diya. Hume bataiyiye aisa koi Isai(Christian) missionary school jaha church nahi? lekin hume batayiye aisa koyi school jaha Masjid ho batayiye koyi School agar aap jante ho tou? …

✦ Islamic Schools ki Jarurat :

Lihaja Apne Bacche ke liye aise School ka intekab kijiye jahan Deeni aur Dunyawi taleem dono sath chalte ho. Ab koi kahe aisa school na ho tou kya kare tou phir aise schools ka intekhab kijiye jo mukammil Neutral ho aur sath me aise ustad ka intezam kijiye jo Quran padhaye, Hadees padhaye aur isi tarah Dua Zikr-o-Azkar karwaye sikhaye. tou jaha School jayega wahi uske liye ustad ka intezam kare. lekin jaha ye dono taleem sath nahi diye jarhe ho to apne baccho ko Masjid bheje taaki wahan moulana usey Qurano Hadees padhna sikhaye aur yaad karwaye aur Deen ka Ilm de taki aapka baccha gumrahiyo se mahfuz rahe.

Isi tarah agar Musalman Zimedar log hai Jo ye takat rutba aur makam rakhte hai wo zarur aise Society qayam kare jaha School tameer kar ke iske andar Deeni aur Duniyawi taleem dono ek sath ho.

To be continue …

Baap ka Kirdar Aulad ki Tarbiyat me

J). Tarbiyat ka 10th marhala :

Baap ka Kirdar Aulad ki Tarbiyat me

Aulaad ki tarbiyat me sirf Maa ka hi Nahi balki Baap ka bhi ek Aham Kirdar hai. lekin Maa se jara Mukhtalif hai. Maa ka role ye hai ke “ke dekho beta tum ye sikh jao, agar tum aisa nahi karoge tou mai tumhare walid se tumhari shikayat karungi,. fir tumhe mare tou mujhe na kehna kuch.”

Tou walid sirf Nigah Daudane par rahenge baccho par “ke kya hua beta tumhara subha se kitni baat tumne apni walida ki nahi suni.” is tarha se samjhao usey , yahi aapka aham Role hoga

Lekin afsos ki baat hai ke Aaj bohot se martaba dekha jata hai ke Walid (baap) apna role ada nahi karte balki jakar Baccho ko Jyada bigaad detey hai,.. “kaha hai mera baccha, Subha se nahi dikha, kis kis ko Maara? bohot accha kiya” Subhan’Allah.

Baccha bolta hai Accha! Baap se tou strong support mil raha hai mujhe. ab mai kuch bhi kar ke aau tou Baap ladne ke liye tayyar hai meri taraf se.

Yaad rakhiye “Jin Ghar me Baap Baccho ko aise kaamo me support nahi karte un Ghar ke Bacche bahar ladna bhi pasand nahi karte, kyunki unhe maloom hai ke agar hum ladenge tou Baap ulta hume hi pitega.” Aur jin ghar me Baap hi kehta hai ke “Jao ladho! hum tumhare piche khade hai..” is tarha se targib dete hai galat kaamo ke liye wo Bacche bhi kaise Gundey nikaltey hai aur Baadme Baap ko bhi thoktey aur maarte hai ,.. kyun tou usne tarbiyat hi yahi di Apne Bacche ko.

✦ Baap ki Zimmedari :

Lihaja Baap ka role Aulad ki Tarbiyat me hai lekin mukhtalif hai maa ke mukable me. Maa ka role ye hai ke wo teacher hai jo sikhati rahengi, aur Baap ka role Examiner ka hai jo aa kar test lega  ka.

Jaise ke “kya kya sikha aaj ?,.. kya hua kaise raha tumhara muamla dinbhar ka ?,.. koi galat kaam tou nahi kiya aaj ?,.. Nasihat suni maa ki ?,.. School aur tuition gaye they ? ,. Arbi ki kitni tayyari hui ? ,.. falah aur falah is tarha sikhana beharhaal Baap ki Zimmedari me se hai.

Maa ki tarbiyat ke baad bacche ke liye 2 hi log hai. Ek Baap aur Dusra Ustad (Teacher). Ye do log hai jo iski tarbiyat Ghar se bahar karenge.

Jaisa ke tum yaha ja rahe ho tou aisa jao,.. logon ko Salam karo Beta,.. Masjid aise jaya karo,.. Saff me aise khadey raha karo,.. logon ko taklif na dena,.. padosiyo ko mat satana. is tarha se bahar ka role Baap ada karega aur uskey teacher, ustad ada karenge. ye do log ab aham Shakhsiyat hai Maa ke baad Zindagi me.

Tou jaha Maa Ghar me tarbiyat kar rahi hai, Kalimaat sikha rahi hai, usi tarha Baap usey bahar ke Aadab aur Akhlaq Sikhayega.

۞ Luqman (Alaihi Salam) ki Apne Bete ko Nasihate Baap ke liye Namuna hai :

Surah Luqman me Aap gour kijiye ke kya nasihate karte hai Luqman (Alaihi Salam) apne bete ko:

" Aye mere bete! Allah ki hi Ibadat karna, uske sath kisiko Sharik na thehrana, aur Namaz qayam karna, Roza rakhna,.. Takabbur mat karna, aur yaad Rakhna ke tum Gunaah chahe ek Patthar ke Andar karo ! Allah usko logon ke samne Zahir karega, khule chupe koi burayi na karna".

– (Mafhoom-e-Quran; Surah Luqman)

♥ SubhanAllah! tou Luqman (Alaihi Salam) ki Nasihate ek mukaam rakhti hai ke waisa role ada karey walid hazraat apni aulad ki tarbiyat me.

To be continue …

Maa ka Aham Kirdar

I). Tarbiyat ka 9th marhala

Maa ka Aham Kirdar

Bacche ki Tarbiyat me Maa ka kirdar bohot hi Aham hota hai yaad rakhiye , isiliye ke Maa Zimmedar hai Aulad, Shohar aur Shohar ke Gharwalo ki.

Ek Nahna Munha baccha apni Maa ko Sajda karte hue dekh wo bhi sajde me chala jata hai, halanki usko kuch bhi samjhta nahi , tou wohi Nanha Munaa Baccha jab Maa ko Jhuth bolta hua dekhta hai tou jhutha bhi ban jata hai, Chugalkhori karte hue sunta hai phone pe tou khud bhi chugliya karne lag jata hai, Dhokhadhadi sunta hai tou Dhokeybaaz ban jata hai , Maa ko Duniyaparasti me mubtela dekhta hai tou khud bhi Duniyaparast ban jata hai. Tou Maa ka Deenpar hona apne Aulad ki tarbiyat ke liye intehayi jaruri hai yaad rakhiye.

Isiliye kisi kehne walo ne badi khub baat kahi ke “Maa Bacche ka pahla Madarsa (School) hai” agar yaha wo paas ho gaya tou aagey kamiyabi hai aur yaha wo fail ho gaya tou aagey kya ho sakta hai beharhaal Allah reham karey.

Aur jab Maao ne koshish ki apne Aulad ki tarbiyat me tou humne Aisi-Aisi shakhsiyaat dekhi jo duniya ke liye misaale ban gayi , Jaise Abdulaah ibn Umar (R.A.) ! andaza lagaiye kya inke Walid Umar (RaziAllahu Anhu) ke paas itna wakt hua karta tha ke wo apne Aulad ki tarbiyat kar sakey?.. Jihad me lagey hai RasoolAllah (ﷺ) ke sath, mahino-mahino tak ghar aana nahi hota.

Usi tarha Abdullah-ibn-Abbas (R.A.), Osama bin Zaid (R.A.) aur lambi fehrist ginayi ja sakti hai aise Sahaba, Tabeyeen , Tabey Tabeyin ki jinka naam aaj hum fakr se letey hai , jinhe Allah ne Sirate Mustakeem par Roshan Chirag ki tarha tamam ummate muslima ke liye misale bana di. kya in ke walid ke paas itna wakt hua karta tha ke wo Aulaad ki tarbiyat kar sakey. Nahi ! ye tou unki Walida (Maa) ki koshish thi jo aaj tamam ummate muslima ke liye misaale hai.

Aur aaj humari maao ne wo Zimma chorr diya fir jo Aulade dikhi beharhaal uska namuna aap sirf ek gali se gujar jaiye jisme ho sakta hai ke aapke gujarne tak aap hazaar gaaliya sun le aur hazar nuksanat aur taklife aapko jhelni padey. Allah Reham karey..

Ye tou Akhlaakh ka muamla hai, ye halaat hai humare muhallo ke , aur ye haalat sirf bahar nahi balki gharo me bhi Bacche apne Maa–Baap ke sath yahi suluk karte hai, kyunki inki tarbiyat par koi dhyan diya hi nahi gaya. ye tou jangli jhaad ki tarha hai jo bus aagaye, ho gaye acche tou ho gaye na hue tou koi inka Pursane Haal nahi.

Tou Maao ne jab apni Zimmedari nibhana chor di tou humne ye natije dekhe, jabki Maa hi Aulad ka pahla madarsa hai. inko chahiye ke ye Aulad ki sabse jyada Acchi Tarbiyat karey.

✦ Maa ki galat tarbiyat ka natija :

Maaye jab tarbiyat acchi nahi karti tou Baap chahe kitna hi Deendar ho kuch asar nahi hota, Aayiye Quraan-e-Kareem se ek Misaal par gour karte hai.

Nooh (Alaihi Salato Salam) Allah Ta’ala ke barguzida Nabi hai , 950 Saal Allah ke deen ki tablig karte hai, lekin Aapki Biwi iman nahi laayi jiska natija ye hua ke apka beta bhi iman nahi laya,. jab maa buri thi tou beta bhi burayi ikhtiyar karta hai,.. yahi haal Lut (Alaihi Salam) ki Aulad ke sath bhi hua,. kyunki Maa bedeen thi lihaja Aulad bhi Bedeen nikli.

Ye do Ambiya (Alaihi Salam) Nabi they Allah ke lekin inki Biwiya Kafir thi. Natijatan inki Aulad bhi kufr ikhtiyar kar letey hai.

Tou Maa ki galat tarbiyat ka natija Nooh (Alaihi Salam) jaise Nabi ka beta bhi baat nahi maana nabi ki, tou Maaye apna role yaad rakhiye ke inki galat tarbiyat ki wajah se bacche bigadtey hai tou Roze Qayamat ye Azabe Jariya ban’ne wala hai.

✦ Maa ki Sahih Tarbiyat ka Asar :

1) Umme Sulem (Razi’Allahu Anha) ka apni Aulaad ki tarbiyat ka tazkira karte hai ke jab inke Shohar yaani Anas bin Malik (R.A.) ke walid (Maalik) they.

Ye Wakiya Allah ke Rasool (ﷺ) ke Hijrat se pahle ka hai Jab Umme Sulem (R.A.) Madina me thi aur Iman layi aur inke Shohar Maalik jab ghar aaye tou inke Shohar ne kaha ke tum tou bigad chuki ho(unke hisab se) , Mohammad (Sallallahu Alaihay Wasallam) ke Deen pe gayi ho, lekin mere betey ko mat bigadna. lekin Umme Sulem (R.A.) baar baar apne betey se kehti ke kaho Anas “la-ilalaha-illalah !” aur Anas(R.A.) Maa ki baat sunkar keh detey they “la-ilalaha-illalah”

Tou Anas (R.A.) ne Baap ki baat na mantey hue Maa ki baat suni, kyunki Maa ka Asar Baap se jyada hota hai Aulad par.

2). isi tarha Hajra (Alahi Salam) bhi ek misaal hai maao ke liye. ke kaisi tarbiyat ki thi unhone apne Bacche Ismayeel (Alaihi Salam) ki , ke jab Baap yaani Ibrahim (Alaihi Salam) 3 se 4 martaba puri zindagi me aatey hai Ismayeel (Alaihi Salam) ke paas, aur jab aakar kaha ke Qurbani ko chalo, tou Ismayeel (Alaihi Salam) ne bina koi sawal kiye kaha ke chalo, Aye mere walid! jo Aap behtar samjhtey ho, jo dekha hai Khwab me kar gujro “Satjiduni in’sha’allahu ma’sabreen!” (in’sha’allah aap mujhe sabr karte hue paoge).

Tou aisa koi Beta ho sakta hai ke Baap itne Zamane baad aaye aur kahe chalo Zuba karna hai aur chale jaye unke sath. ye tarbiyat thi Hajra (Alaihi Salam) ki apne Aulad ki. Lihaja Maa sabse pahle apne aap ko tayyar kar ley aur agar inhone apna Haq ada nahi kiya tou Roze Qayamat ye tayyar rahe apne Azab ke liye.

To be continue ..

♥ in sha Allah ! agley part 8 me hum Baap ka bhi role dekhenge Aulaad ki tarbiyat me.

Aulad ki Tarbiyat me Maa ka Aham Qirdaar

 Aulaad Ki Tarbiyat – Part 2

✦ Aulaad ki Tarbiyat kaise kare ?

Ab aulaad ki tarbiyat kaise karey , kya iske liye usool apnaye , kounse nuqaat (points) ko dhyan me rakhey? in’sha’allah chand nuqaat aapke samne hum rakhne ki koshish karenge. inme kuch baate hum asi bhi rakhenge jispar aapko tajjub bhi ho sakta hai ke is cheez ka Aulaad ki tarbiyat se kya rishta, tou aayiye ispar gour karte hai.

Ek Shakhs they! wo ek Aalim ke paas gaye aur kaha: “Mai Apni Aulad ki Tarbiyat ke talluk se bada Pareshan hu”

uss Aalim ne pucha: “kya Umar hai Aapke Bacche ki ?”,. Uss Shakhs ne kaha : “4 ya 5 Mahine”

Tou wo Aalim kehte hai ke: “Uski Tarbiyat ka Waqt tou chala gaya…” Wo Shakhs pareshan ho gaya ke 4 ya 5 mahine ke Bacche ki Tarbiyat ka wakt aise kaise chala gaya.

Tou uss Aalim ne jawab diya aur kaha: Aulad ki tarbiyat me sabse pehla nukta ye hai ke uske liye acchi maa chunkar laya jaye” Subhan’Allah !

Beshaq Aulad ki Tarbiyat me Maa ka Aham Qirdaar hai, lihaja uske liye Sahih Maa ka Intekhab karna Tarbiyat ka sabse pehla aur Aham Marhala hai.

A) Tarbiyat ka 1st Marhala

› Nek aur Deendar Maa ka Intekhab:

Umar bin khattab (RaziAllahu Anhu) ke paas ek Shaksh laya gaya , jiske Walid ne usey Ghasit kar laya aur kaha ke “Aye Ameer-ul-mominin ! mera ye beta meri baat hi nahi sunta.”

Pucha gaya ke kyu baat nahi suntey apne waalid ki ?.. tou us Ladke ne kaha ke – “Aye Ameer-ul-Mominin ! pehle Mai Aapse ek Sawal karta hu ke “Aulaad ke Haq kya hai?”

Usey bataya gaya ke: “Aulaad ke liye sabse pehla Haq ye hai ke uskey liye sabse Acchi Maa ka intekhab kiya jaye.”

tou ye sabse Aham cheez hai Aulaad ki Tarbiyat me uske liye acchi Maa ka intkhab kare aur zahir si baat hai ke jo insan apne liye Acchi Biwi talab karega fir wo bhi tou uska Mustahik hoga yaani Nek aur Deendar Sifat ka Haamil hoga.

Lihaja jo log chahtey hai ke unki Aanewali Naslo ki Tarbiyat Kitabo Sunnat ke mutabik ho tou Nikaah se pehle hi Ghar ke Zimmedar apni Beti ke liye accha Shohar, bete ke liye Acchi Biwi ya khud shakhs apne liye acchi Biwi ka Intekhab karey aur acchi se muraad Deendari hai.

Iske taaluk se Allah ke Rasool (Sallallahu Alaihay Wasallam) farmatey hai:

“ Aurto se Nikah 4 chezo ki buniyad par kiye jate hai, lekin tum Deendari ko thaam lo. ”

- (Bukhari: jild 3, Safa 59)

Yaani Deendar Aurat se Nikaah karke Duniya aur Aakhirat ki kamiyabi hasil karlo aur acchi Nek Sifat Deendar Aurat ko hasil karne ke talluk se Aap (Sallallahu Alaihay Wasallam) farmatey hai :

“ Ye Duniya tamam ki tamam khair ki cheez hai, kamane ki cheez hai aur usme sabse khair jo cheez hai wo hai Nek Aurat (Biwi) ”

- (Sahih Muslim)

Tou apne liye Nek Biwi aur apni Aulaad ke liye Nek Maa ka intekhab ye bohot hi Aham cheez hai. ye apne hone wali Aulaad ki Tarbiyat ka sabse pehla aur Aham Marhala hai.

♥ In sha Allah ul Azeez !

Allah Ta’ala hume kehne Sun’ne se jyada Amal ki taufik dey ..

To be Continue …

Aye Allah... mujhe Nek Aulad ata farma

B). Tarbiyat ka 2nd Marhala ›

Allah se Nek Aulaad talab karey:

Ab Acchi Biwi ke intekhab ke baad jab Nikaah ho jaye tou Allah se nek Aulaad talab karey. Khalis Apne Rab se Dua karey ke – “Aye Allah hume Nek Aulaad dey, Saleh Aulaad ata farma”

Yaad rakhiye – ye bhi Aulaad ki Tarbiyat ke marhale me se hai. isiliye Kyunki Allah Apne Bando ko waise hi ata karta hai jaisa ki wo tadap rakhtey hai. lihaja apne Rab se Nek Aulaad ki hajat bhi tarbiyat ke marhalo me se ek marhala hai.

Aur Nek Aulaad ki talab ki kitni Ahmiyat hai iske talluk se Allah Rabbul Izzat ne Quraan me apne 2 Ambiyao ki Duao ka tazkira kiya ke –

Ek jagah Ibrahim (Alaihi Salam) Dua karte hai:

" Rabbi Habli Minn Salehin

(Aye Allah ! mujhe Nek Aulaad ata farma)

- (Surah As-Saffat 37:100)

Aur dusri jagah Allah Rabbul Izzat ne Zakariya (Alaihi Salam) ki Dua ka tazkira karte hue farmaya: 

" Rabbi hab lee mil ladunka zurriyyatan taiyibatan innaka samee ud dua

(Aye Allah mujhe Aulaad ata farma Aisi Aulaad jo Acchi ho)

- (Aale Imran 3:38)

Tou Aulaad ki Tarbiyat ka dusra marhala ye hai ke apne Rab se nek aur Saleh Aulaad talab karey.

#Aulad ata karna sirf Allah ke zimme hai:

Yaad rakhiye Aulaad dena aur na dena ye sirf aur sirf Allah ke zimme hai.ispar Allah ke siway hargiz koi Qadir nahi. warna dekha jata hai ke Nikaah ke ek-do Saal tak agar Aulaad na ho tou bas lag gaye hama Aksaam ke Shirko Biddato me. Allah hidayat de humare aise Muslaman Hazraat ko jo aisi Shirko Biddate karke Allah ki nazil karda Hidayat ki khul kar mukhalifat kartey hai.

Allah Rabbul Izzat iske talluk se Quraan me Wajeh farma chuka hai ke:

" Saare Asmaan wa Zameen ki hukumat Allah hi ki hai, wo jo chahta hai paida karta hai,. aur jise chahta hai sirf betiyan deta hai aur jise chahta hai mahaj beta ata karta hai. ya bete-betiya dono kism inayat karta hai aur jisko chahta hai baanz bana deta hai, beshaq woh bada wakifkar qadir hai

– (Surah Ash-Shuraa 42: 49-50)

Lihaja ye Allah ki marji hai ke kisko Aulaad ata karna hai, aur kisko nahi… isme Allah ke alawa koi Qudrat nahi rakhta.

To be Continue …

Apne Baccho ko Jahannum ki Aag se Bachao (Part 1)

Aulaad ki Tarbiyat – Part 1

*Allah ke Naam se Shuru Jo tamam jahano ko banane wala aur usey palney wala hai! aur Duroodo Salaam ho Uskey aakhri Nabi (Sallallahu Alaihi Wasallam) par*

Aaj kal aksar dekha jata hai ke Waldain apni Aulad ke talluk se Pareshan rehte hai ke kis tarha unki Tarbiyat ki jayey. kis tarha unhe accha Momin banaye. aur yahi cheez yaani Aulaad ki Tarbiyat aaj ke Jadeed dour me ek Sangeen masla hai, aur iski Shiddat har Gujarne wale saal me badhti ja rahi hai.

♥ In’sha’Allah-Ul-Azeez!

Hum is unwan me Aulad ki Tarbiyat ke tehat kuch Nuqaat (points) aapke samne rakhne ki koshish karenge, Aapse hazraat se darkhwast hai ke ispar jarur tawajjo de aur jitna ho sakey isey jyada se jyada logon tak pohochane me humari madad kare.

Sabse Pehli Baat ye ke –

” Aulad Allah Rabbul Izzat ki taraf se ek Nemat hai.”

Aur jaisa ke har Nemat ke Talluk se Allah Rabbul Izzat Humse puch Karega tou Aulad bhi ek Nemat hai lihaja Iske Talluk se bhi sawal kiya jane wala hai ke kya aur kaise iski tarbiyat ki ?

Jiske talluk se Allah Rabbul Izzat Quran me farmata hai :

“ Aye wo logo jo Iman laye ho! Apne Aap ko aur Apne Ahlo Ayal ko Jahannum ki us Aag se bachao jiska indhan Insan aur Patthar honge ”

- (Al-Quran 66:6)

Tou yaha Allah Rabbul Izzat ne Apne bando par ye Farz kar diya hai ke, Mere bando apne aapko aur apne biwi baccho ko Jahannum ki Aag se bachao, yaani unki aisi tarbiyat karo ke wo Halal aur Haram me tafreeq kar sakey, Allah aur Uske Rasool ki farmabardari karey aur har Uss amal se bachey jo duniya aur aakhirat ke khassare ka sabab baney.

Tou Aulaad ki Tarbiyat yaad rakhiye bohot aham aur sangeen masla hai, Iski Ahmiyat aur Jarurat ko samjhiye, iske duniyawi aur ukhravi faydo ko janiye, agar humne aisa na kiya tou dunia aur aakhirat ka bada nuqsan uthana lazim hai.

✦ Aulaad ki Tarbiyat na karne ke Nuqsanat:

Aulaad Walidain se jhagda karti hai, Waldain ko Gaaliya deti hai, Aas-Pados ko, Mahoul aur Muashre ke logo ko takleef pohochati hai, Walidain ko Ruswa karke Ladke Ladkiya bhagakar kar Nikah kar lete hai, Budhey Waldain ko Ghar se nikaal kar Old Age Home me chorr aatey hai, hatta ke chand Duniyawi mafad ke liye Waldain ka Qatl tak kar lete hai (Astagfirullah).

Aise Qaqiyat ki fehrist hum nikalenge tou bohot lambi hoti jayegi. beharhaal ye sirf aur sirf Aulaad ki sahi Tarbiyat na karne ka natija hai. aur pata bhi nahi aise kitne Zurm hotey hai jiski Sangeeni aur inteha hum bayan bhi nahi kar sakte.

– is liye kyunki Aulad ki sahi Tarbiyat nahi hoti. aur jab ek Baccha Apne Waldain ke sath ye Sulooq karta hoga Mu’ashre aur Mahoul, Padosi aur Musafiro ka, sath wale logon ka kya Sulooq karta hoga wo tou sirf Gumaan hi kiya ja sakta hai.

Tou Aulaad ki Tarbiyat ye bohot Aham masla hai yaad rakhiye aur Agar Humne ye na kiya tou Dunia aur Aakhirat ki badi ruswayi hai humare liye.

♥ In’sha’Allah ! Agle Part 2 me Hum Aulaad ki Tarbiyat ke talluk se chand aham Nuqaat par Gour karenge.

To be Continue …

Aulaad ki Raja'at (doodh pilane ka marhala)

E). Tarbiyat ka 5th marhala

Aulaad ki Raja’at (doodh pilane ka marhala)

Aulaad paida ho gayi,. uska Aqiqah kiya,. ab usko Doodh pilaney ka jo marhala hai usey raja’at kehtey hai aur “Bachche ko Maa ka Doodh pilane ki muddat 2 Saal hai” 

– (Al Quran 2:233)

Baccho ka ye Haq hai ke unhe Maa ka Doodh miley, liahaja Bilawajah (bina kisi marj ke) unka ye Haq unsey mat chiniye. warna Aajkal aksar Western Culture se mutaseer hokar khawatin apni Jismani sakth ko banaye rakhne ke liye Apni Aulaad ko apna doodh pilaney ke bajaye (tin ke) dibbo ka doodh pilatey hai.

Yaad rakhiye jo Bacche apni Maa ka doodh nahi pitey (Bahalatey majburi alag baat hai) unhe na aapse waisi Mohabbat hongi aur na wo Mamta ka jasba hoga aur na wo Aapke sath wo Unsiyat rakhenge jo Bacche Apni Maa ka Doodh pitey hai.

Umro bin Abdullah (R.A.) Unki Biwi se humesha kehtey they jab wo bacchey ko doodh pilaya karti thi ke –

“Tu Apne Bacche ko is tarha Doodh na pilana jaisa janwar pilatey hai, balki apne Bacchey ko aisa Doodh pilana ke tu us se Pyaar, Mohabbat, Shafaqqat aur Narmi bartey, humdardi ka muamla rakhey, uspe raham kare aur in tamam se badhkar allah se azr aur sawab talab karey ke allah ki ek makhlookh tujhse rozi paa rahi hai, aur fir yahi Baccha bada hokar Allah ki ibadatey karega, tawheed par chalega, iska azar bhi tujhiko milne wala hai”

Tou ye Niyat karke Aurte agar Doodh pilaye tou Subhan’allah kya unke bacchey honge aur kya ajar milega ke wo Baccha jis par Nashronuma paya hai uss Maa ko bhi uske Bacche Nek amal ka azr milne wala hai.

F). Tarbiyat ka 6th Marhala:

Acchi Baate Bolna Sikhaiye

Ab raj’at ke baad jab Bacchey bolne lage tou unhe Allah ke Naam sikhaiye, Acche Qalam, Acchi Acchi Baatey Sikhaiye.

Lekin Afsos ki baat aaj humare muashre me ye hai ke jab humare Bacche bolne lagtey hai totli Zubaan me tou log unn Baccho ko Gaaliya Sikhatey hai aur fir Gaaliya dene bhi lagatey hai ke: “Dekho MashaAllah mera Baccha kitni Acchi Galiya deta hai totli Zuban me” Subhan’Allah!

Aur fir yahi Baccha jab bada ho kar Sidhi Zuban me waise hi Gaali dene lagta hai tab badi Sharmindagi mehsus hone lagti hai hume. tab Ehsas hota hai ke kya Tarbiyat di thi humne isey jiska natija Aaj humare samney hai.

Tou beharhaal Apne Baccho ko Fizul Cheezo ke bajaye Allah ke Naamo Sifat Sikhaiye, Acche Qalimaat , Acche Alfaz Sikhaiye. ye unka haq bhi hai aur ye uski parwarish me bohot aham Muqam rahta hai yaad rakhiye.

Aur yaha ab asal role aaya Maa ka –

baap tou Rozi Roti kamane chal deta hai kaam ko, Subha gaya aur Shaam me aaya. Ab Maa Bacche ke Sath Din-Raat hai, tou wo Sikhayegi ke “Beta! bolo Allah”

Apne Rab ka taruf dena hai Maa ne Apni Aulaad ko, hala ke wo baat samjhta nahi uss umr me, lekin yaad rakhiye ye Bacche jo hotey wo boltey nahi aisi umr me lekin dekhtey, suntey aur samjhtey hai , ye 3 salahiyatey inme paidaish se hoti hai, lihaja ye recorder ka kaam karte hai , “ke chaha ki ye fitrat hai, maamu ki ye fitrat hai,.. maa aur baap ki ye fitrat hai.”

Aap dekhiye ke jitna chotaa Baccha Ghar me utna hi hoshiyar hota hai wo. kyunki Pehla Baccha jo hota hai wo Aam taur se badi khamosh tabiyat ka sanjida hota hai, kyunki usne Ghar me sirf 2 logon ko dekha hota hai. (Maa-aur Baap, ya Dada-Dadi ya kuch aur logon ko).

Dusra baccha jab aata hai tou thodey aur logon ko dekhta hai , yaani Maa-Baap, Badey Bhai ko aur apne aapko, Teesra (3rd) baccha jo hota hai wo aur Aqlmand hota hai kyuni wo 4 logon ko Paidaish se dekhta aur Ghurta rehta hai.

✦ Bacche me Naqal karne ki Salahiyat hoti hai lihaja uske samne koi galat harqat na kare.

Tou baccha jo abhi leta hua hai wo recorder ki tarha hota hai , har cheez ko dekh raha hota hai , agar Maa-Baap uske samne Behayayi karenge tou wo Baccha bhi bada hokar Behaya niklega.

Aur yahi wajah hai ke chotey chotey Bacche jinko hum Ahmiyat detey hai unhe wo bhi Ahmiyat detey hai , Baap Mobile ko Ahmiyat deta hai tou Baccha bhi Mobile hi Sabse pahle Mangega , Nakli Mobile dijiye tou fek dega kyuni usko maloom hai ke ye nakli hai , isme Roshni nahi Chamak rahi.

Tou Bacche bachpan se hi badey Zaheen hotey lihaja unki Maa ki yaha jimmedari banti hai ke wo cheezo ka taruf dey , aur sabse Awwal taruf apne Rab ka dey , Bacche ko Acchi-Acchi baate sikhaye , aur nahi bhi sunta hai tou usey boltey rahe kyun ke wo sunta aur khamoshi se samjhta bhi hai.

Lekin Aaj muashre me dekha jata hai ke Maaye aisa rishta jodti nahi apni Aulaad se , isiliye hum dekhte hai humare paas ke Akide ka Muamla bada kamzor nazar aata hai , na Allah se Mohabbat aur na uskey Rasool (Sallallahu Alaihay Wasallam) se Mohabbat ka jasba hai , kyuni wo sikhatey hi nahi baccho ko bachpan se.

Lihaja Maa apna Role Ada karey apne Baccho ko apne Rab ka taruf dey , Isiliye RasoolAllah (Sallallahu Alaihay Wasallam) ne farmaya ke “Deendar ladki ka intkhab karey” yaani wohi marhala jo sabse pahla liya humne.

To be Continue …

Har Bacha Apney Aqiqah ke sath Girwi hota hai

Aulaad ki Tarbiyat – Part 4

C). Tarbiyat ka 3rd Marhala ›

Aulaad Ladka ho ya Ladki dono ko Qabool karey:

Ab Allah ne Aulaad ata kardi aapko, tou ladka ho ya ladki dono ko Qabool kariye khushi se. warna aisa na ho ke jis tarha Dour-e-Jahalat me hota jo Quraan me Allah ne farmaya ke: “Jab kisi ko khabar di jati ke usey Ladki hui hai tou uska muuh siyaah aur kala ho jata” gham se aur pareshani se aisa na ho yaad rahiye. Jabki RasoolAllah (Sallallahu Alaihay Wasallam) apni Ummat ko basharat detey hue farmatey hai ke:

“Jisko 3 ladkiya ho aur unki Acche se Tarbiyat karey, unka Nikaah kara dey tou wo Shakhs Jannat me mera Padosi hoga.”

♥ Subhan’Allah. Allah ke Rasool Jannat ki basharat de rahe hai betiyo ki Paidaish par, lekin Afsos ke hum log Maddaparast Dunia ke fareb me aakar apni Bacchiyo ki Paidaish ko boz samjhne lage hai.

Allah hume kehne sun’ne se jyada Amal ki taufik dey.

D). Tarbiyat ka 4th marhala:

Aulad ka Aqiqah karey

Aulaad ki paidaish ke 7 ve din uska Aqiqah karna ye bhi uski tarbiyat me se ek hai. isiliye kyunki jab baccho ko ye pata chalega ke uske Waldain itney Sanjida they uski Tarbiyat ke liye ke uski paidaish se pahle se hi uske liye Acchi (Nek) Maa ka intkhab kiya, uske liye Allah se Dua karte rahe aur paidaish ke baad Sunnat ke mutabik 7 ve Din me Aqiqah kiya tou ye Baccha bhi Deen ki taraf mayeel hoga.. aur ye Aulad ke huqooq me se bhi hai ke 7ve din uska Aqiqah kiya jaye.

Lekin afsos ke jab Dushmanan-e-Deen ne Islam par waar karna Shuru kiya tou sabse pahle Nabi ki Sunnato ke bilmukabil Fizul ke Rasmo Riwaj Ijad kiye.

Jabki Sunnat tou ye hai ke 7 ve din Aqiqah kiya jaye lekin Sunnat ki Mukhalifat me Aaj humare Mu’ashare me 6th ve din chatti ki jaati hai. aur usme bhi tarah tarah ki Rasme ki jaati hai jiska Shariyate Islamiya se koi talluk nahi. Allah bachaye hume in khurafato se ,..

Lihaja ladka ho ya ladki ho Sunnat se sabit Aqiqah kiya karo unka. ladki ke liye ek Baqra aur Ladke ke liye 2 Baqre Zubah karo,.. Accha sa Naam rakho unka , ija dene wali cheez unse door karo yaani unke Baal Tarshwao,.. aur istehaat ho tou unke baal ke wajan ke barabar chandi taqseem karo Garibo me,.. aur ladka ho tou khatna kiya jaye. ye Aulaad ka Haq hai.. yahi unki Tarbiyat me Shamil hai.

Aqiqah ki Ahmiyat ke talluk se riwayat me aata hai ke: Aap (Sallallahu Alaihay Wasallam) farmatey hai –

“Har Bacha Apney Aqiqah ke sath Girwi hota hai’ lehaza uska Aqiqah 7ve din karey aur Bacchey ka Naam bhi Rakha jaye..” 

– (Abu Dawud 2837 and At-Tirmithi 1522)

Yaani Allah ne ek nemat di hai Aapko, tou abhi wo Girwi hai Allah ke paas, usey churaiye uska aqiqa karke. Aur jab usey pata chalega ke “Beta humne tumhara Aqiqah Allah ke Nabi (Sallallahu Alaihay Wasallam) ki Sunnat ke mutabik kiya tha, tumhare paida hone se pahle hi tumhara naam tay kiya tha” tou Maa-Baap ki us justju aur koshish ko dekhkar uss bacche par bhi kya asar hoga jara gour hi kijiyega.

Aur isme bhi ek Aham baat ye hai ke unke Acche Naam Rakhey. aur uss naam ko Shakshiyato se Wabasta rakhey yaani “Beta humne Aapka Naam Salman isliye rakha ke ek Sahabi they Salaman Farsi (R.A.) unke imaan laaney ki dasta aisi aur aisi hai. ” tou aapki Aulaad bhi uss Seerat par gour karegi,.. aur unki tarha ban’ne ki justju rakhengi.

Warna Naamo ke kya kuch Galat Asarat nahi hotey beharhaal bataney ki jarurat nahi. “kyuni jab bacchey ka naam tou Salman Bhaijan se mutasir hokar rakha aapne fir wo usi bhaijan ko role model banakar zindagi bhar nachata rahega aapko,..”

Tou beharhaal Aulaad ki paidaish ke 7ve din Sunnat ke mutabik uska Aqiqah kare. warna humne Sunnat ko chorr Biddate apna li, tou humari Aulaad bhi Biddato ke aadi ho jaengi, kyuni Shaitan ne tou har cheez me wargala diya momino ko, ki tum Sunnat ko kaha Amal me la rahe ho ? ,.. Biddatey karo,. Khurafat karo,.. Rasam Rasmaney karo,.. usi me tou maza hai ,. Allah hume bachaye tamam Gairsharayi amaal se.

To be Continue …

Apne Gharwalo ka Raasta Dikhaye

Chote Hamesa Apne Bado Se Sikhte Hai, Ibadatein Bhi, Nafratein Bhi, Mohabbatein Bhi.

Beti ki Parwarish

Beti ki Parwarish

Jisey Ladki Ho Aur Wo Usey Zinda Dafan Na Kare, Na Usko Zaleel Samze Aur Na Ladke Ko Uss Par Ahmiyat De Tou Allah Ta'ala Usko Jannat Me Dakhil Karega..

Abu Dawood, Jild 3, Bab 548, 

Hadees 1705, Safa 616